धरान: सञ्चारकर्मी तथा सञ्चारगृहमाथि भएको आक्रमणको घट्नाले असुरक्षित महसुस भएको भन्दै सुरक्षाको प्रत्याभूतिको माग सहित नेपाल पत्रकार महासंघ सुनसरीले जिल्ला प्रशासन कार्यालय सुनसरीमा ध्यानाकर्षणपत्र बुझाएको छ ।
महासंघ सुनसरीले सुनसरीले प्रजिअ मार्फत गृहमन्त्रालयलाई सुरक्षाको प्रत्याभूतिको मागसहित घटनामा दोषी उपर कारबाहीको मागसहित ध्यानकर्षणपत्र बुझाएको हो मंगलबार बुझाएको ध्यानाकर्षणपत्रमा महासंघ सुनसरीले राज्यको चौथो अंगलाई संबिधानमै प्रेस स्वतन्त्रता अभिव्यक्तिको अधिकार पदत्त गरेको भए पनि पछिल्लो समय बारम्बार पत्रकारिताको पेसागत अधिकारमाथि भएका हमलाले पत्रकारहरु असुरक्षित महसुस भएको भन्दै सुरक्षाको ग्यारेटी हुनुपर्ने माग राखेको छ । प्रेस तथा अभिव्यक्ति स्वतन्त्रतामाथि धावा बोल्ने कुत्सीत मनसायले भएका पछिल्ला गतिविधिप्रति महासंघ खेद व्यक्त गर्दै शान्तिपूर्ण आन्दोलनको नाममा अराजक गतिविधिलाई प्रशय दिइरहेको समूहले सञ्चार गृहमा तोडफोड गर्ने देखि पत्रकारमाथि आक्रमण भएको विषयमा गृह मन्त्रालयको ध्यानाकर्षण गराएको छ ।
महासंघ सुनसरी चैत १५ गते शुक्रवार काठमाडौंमा भएको राजावादीहरुको आन्दोलनमा आक्रमणमा परी पत्रकारको मृत्यु र सञ्चारगृहमाथि भएको आक्रमण निन्दनीय भएको भन्दै राज्यका तर्फबाट यस्ता गतिविधिको नियन्त्रण गर्न माग समेत गरेको छ । ध्यानाककर्षण पत्रमा भनिएको छ ‘राजावादीको आन्दोलनका क्रममा अन्नपूर्ण मिडिया ग्रुपको भवनमा तोडफोड, हिमालयन टेलिभिजनको सवारी साधन तोडफोड र कान्तिपुर टेलिभिजनको भवनमा डुङ्गामुढा हान्ने गतिविधिको महासंघ घोर भत्सना गर्दछ । प्रेस तथा अभिव्यक्ती स्वतन्त्रता, मानवअधिकार तथा लोकतन्त्रको विरुद्धमा भएका यस्ता गतिविधिको नियन्त्रण र कडा कारवाही हुनुपर्ने महासंघको ठहर छ ।’
महासंघ सुनसरीले आन्दोलनको नाममा सञ्चारकर्मीको हत्या गर्ने, प्रेसलाई आतङ्कित र त्रसित बनाउने गलत गतिविधिलाई स्विकार गर्न नसकिने भन्दै विधिको शासनको पालना गर्न तयार भएको पत्रकारिता क्षेत्रमाथि भएको आक्रमण निन्दनीय भएको जनाएको छ ।
मंगलबार जिल्ला प्रशासन कार्यालय सुनसरीमा पत्रकारको टोली पुगेर प्रमुख जिल्ला अधिकारी धर्मेन्द्र कुमार मिश्रलाई पत्रकार महासंघ सुनसरीका सचिव विनय बाराकोटीद्वारा हस्ताक्षरित ध्यानाकर्षणपत्र बुझाउँदै राजसंस्था पुनस्थपनाको माग राख्दै भएको आन्दोलनमा सहभागी अराजक समूहले समाचार सङ्कलनको क्रममा सञ्चारकर्मीलाई जलाएर हत्या भएको विषयले थप गम्भीर बनाएको जनाएको छ । समाचारको लागि भिडियो खिचिरहेका एभिन्युज टेलिभिजनका पत्रकार सुरेश रजकको हत्याले सबै पत्रकार मर्माहत भएको भन्दैं पत्रकार सुरेश रजकलाई हत्या गर्ने समूह वा व्यक्तिको खोजी गरी कारबाहीको दायरामा ल्याउन गृहमन्त्री समक्ष जोडदार माग गरिएको छ ।
ध्यानाकर्षण पत्र बुझिसकेपछि सुनसरीका प्रजिअ मिश्रले ध्यानाकर्षणपत्र गृहमन्त्रालयसम्म पुर्याउने प्रतिबद्धता जनाउनुभयो । उहाँले राज्यको चौथौ अंग, समाजको ऐना पत्रकारको सुरक्षाको लागि सुनसरी प्रशासन गम्भीर भएको बताउदै सञ्चारकर्मीहहरुलाइ सुरक्षाको प्रत्याभूतिको प्रतिबद्धता जनाउनुभयो ।
