काठमाडौ: मुटुमा प्वाल परेको समस्याबाट सात महिनादेखि उपचाररत काठमाडौंका टेम्पो चालक रमेश तामाङलाई नेपाल यातायात स्वतन्त्र मजदुर संगठनले ८९ हजार ३ सय आर्थिक सहयोग गरेको छ। महाराजगञ्जस्थित बाँसबारीको शहीद गंगालाल राष्ट्रिय हृदय केन्द्रमा उपचाररत तामाङलाई संगठनले सोमबार अस्पतालमै पुगेर सहयोग हस्तान्तरण गरेको हो ।
आगामी आइतबार तामाङको मुटुको शल्यक्रिया हुँदै गर्दा सोमबार संगठनका केन्द्रीय उपाध्यक्ष नवराज घिमिरे सहितको टोलीले ५० हजार १ सय हस्तान्तरण गरेको छ । यसअघि नै ३९ हजार २ सय समेत संगठनले सहयोग गरिसकेको छ । परिवारको मुख्य आयस्रोतका रूपमा रहेका तामाङको उपचारमा थप सहयोगका लागि सबै श्रमिकलाई संगठनले आह्वान समेत गरेको छ । काठमाडौंको अनामनगर रुटमा बा.१ ह. ३९९३ नम्बरको टेम्पो चलाउँदै आएका तामाङलाई गत फागुनमा मुटुमा प्वाल परेको समस्या पहिचान भएको थियो । उनी २०६० सालदेखि अनामनगर रुटमा टेम्पो चालकका रूपमा कार्यरत छन् ।
हेटौंडाका स्थायी बासिन्दा तामाङ काठमाडौंमा भाडामा बस्दै आएका छन् । आफ्नो श्रमबाट श्रीमती, एक छोरी र एक छोराको पालनपोषण तथा शिक्षादीक्षा गर्दै आएका उनी अहिले गम्भीर स्वास्थ्य समस्याका कारण पारिवारिक समस्या थपिएको छ ।
नेपाल यातायात स्वतन्त्र मजदुर संगठन काठमाडौं टेम्पो कमिटीमार्फत सहयोग जुटाइएको हो । तामाङको उपचार तथा पारिवारिक अवस्थालाई ध्यानमा राख्दै संगठनले निरन्तर सहयोग गर्दै आएको काठमाडौं टेम्पो कमिटीका कोषाध्यक्ष धर्मराज सापकोटाले बताए । उनको उपचारमा सहयोग गर्न संगठनमार्फत सम्पूर्ण श्रमिकहरुलाई आह्वान गर्छौ सापकोटाले भने ।
अस्पताल पुगेको टोलीले तामाङको स्वास्थ्य अवस्थाबारे जानकारी लिनुका साथै उपचारमा आवश्यक सहयोगका विषयमा समेत छलफल गरेको छ । श्रमिकलाई बचाउन संगठनको तर्फबाट कुनै कसुर बाँकी नराखीने संगठनका केन्द्रीय अध्यक्ष भीमज्वाला राईले बताए । अस्पतालमा तामाङलाई भेट्न संगठनका केन्द्रीय उपाध्यक्ष घिमिरेसहित केन्द्रीय सदस्यहरू कृष्णमाया ब्लोन, कमल सापकोटा, बागमती प्रदेश अध्यक्ष वेदप्रसाद घिमिरे, उपसचिव नारायण श्रेष्ठ (काइँला) तथा सदस्यहरू विकास लामा र तीर्थमाया लामा लगायत पुगेका थिए।
संगठनले श्रमिक तथा उनीहरूका परिवार स्वास्थ्य संकटमा पर्दा उपचार तथा राहतमा सहयोग गर्दै आएको जनाएको छ । श्रमिकको स्वास्थ्य, सामाजिक सुरक्षा र आपतकालीन अवस्थामा संगठनको साथलाई थप व्यवस्थित गर्दै लैजाने संगठनका अध्यष भीमज्वाला राईको भनाइ रहेको छ।
