धरान: धरान संगीत प्रतिष्ठानले विश्व संगीत दिवसको अवसरमा वरिष्ठ गायक रामा मण्डल लाई ‘स्रष्टा सम्मान–२०८३’ बाट सम्मान गर्ने भएको छ।
शुक्रबार आयोजित पत्रकार सम्मेलनमा प्रतिष्ठानले असार ७ गते आइतबार विश्व संगीत दिवसको अवसरमा सांगीतिक कार्यक्रमसहित स्रष्टा सम्मान कार्यक्रम आयोजना गर्न लागिएको जानकारी दिएको हो।
धरान–१८ स्थित विपी प्रतिस्ठान परिसरस्थित दशहरा हलमा परिसरको दशहरा हलमा हुने भएको छ ।
प्रतिष्ठानका अध्यक्ष रमेश राईका अनुसार ‘कहाँ छौ कहाँ’, ‘यो केटीको ठीक छैन चाला’ र ‘अरुणीमा म तिमीलाई माया गर्छु हो’ लगायत चर्चित गीतका गायक मण्डललाई यस वर्ष सम्मान गर्न लागिएको हो।
धरान संगीत प्रतिष्ठानले विगत एक दशकदेखि विश्व संगीत दिवस मनाउँदै विभिन्न वरिष्ठ स्रष्टा तथा संगीतकर्मीलाई सम्मान गर्दै आएको छ। यसअघि वरिष्ठ गायक तथा संगीतकार दिप श्रेष्ठ, एलपी जोशी, प्रेमध्वज प्रधान, वरिष्ठ गीतकार शंकर थापा, गायिका लोचन भट्टराई र मिलनसिंह खाती लगायतलाई सम्मान गरिसकेको प्रतिष्ठानले जनाएको छ।
प्रतिष्ठानले स्थापना कालदेखि नै संगीत विद्यालय सञ्चालन गर्दै आएको र हालसम्म ५०० भन्दा बढी बालबालिकालाई संगीत शिक्षा प्रदान गरिसकेको जनाएको छ। आर्थिक अवस्था कमजोर भएका बालबालिकालाई निःशुल्क संगीत शिक्षा समेत उपलब्ध गराउँदै आएको प्रतिष्ठानको भनाइ छ।
