धरान: जनता समाजवादी पार्टी नेपाल जसपा नेपाल धरान उपमहानगर समितिको आयोजनामा संघीयता, सुशासन, सामाजिक न्याय र समाजवादको माग गर्दै शुक्रबार धरानको भानुचोकमा कोणसभा सम्पन्न भएको छ।
कोणसभामा पार्टीका धरान अध्यक्ष ताजुव लिम्बुले नेतृत्वको कमजोरीका कारण ‘जेनजी आन्दोलन’ उत्पन्न भएको स्वीकार गर्दै मुलुकमा भ्रष्टाचार, नातावाद र एकाधिकारवाद दिनदिनै बढिरहेको आरोप लगाए। उनले भने ‘राज्य संयन्त्र कमजोर हुँदा जनआक्रोश बढेको हो ।” देशमा बढ्दो भ्रष्टाचार, नातावाद र एकात्मकवादका कारण शासन प्रणाली जनताको भरोसाबाट बाहिरिँदै गएको छ।”
उनले मुलुकमा बढ्दो भ्रष्टाचारप्रति गम्भीर चिन्ता व्यक्त गर्दै भ्रष्टाचारविरुद्ध शून्य सहनशीलता नीति अपनाउनुपर्ने बताए । भ्रष्टाचारी नेताहरूमाथि कडा कारबाही, निष्पक्ष छानबिन र सुशासन कायम गर्न राज्यले ठोस कदम चाल्नुपर्ने उनको भनाइ थियो।
अध्यक्ष लिम्बुले पार्टीले हालको अन्तरिम सरकारसँग पहिचानको आधारमा संविधान संशोधन तथा पुनर्लेखन गर्नुपर्ने माग दोहोर्याउँदै हालको संघीय संरचनालाई परिमार्जन गरी १०+१ प्रदेश संरचना, प्रत्यक्ष कार्यकारी राष्ट्रपति प्रणाली, पूर्ण समानुपातिक निर्वाचन प्रणाली लागू गर्नुपर्ने स्पष्ट माग राखेको बताए ।
उनले कोशी प्रदेशको नामाकरण पहिचानमा आधारित हुनुपर्ने धारणा राख्दै ‘मुक्कुलुम’मा नो केबलबारको अवधारणाको पूर्ण कार्यान्वयन आवश्यक रहेको उल्लेख गरे।
अध्यक्ष लिम्बुले धरानका नगरप्रमुख हर्क साम्पाङप्रति इंगित गर्दै “पपुलिज्म, हचुवा र भाइरलका पछि लागेर मात्र राजनीति सफल हुँदैन” भन्दै राजनीतिक दल र नेतृत्व स्पष्ट नीति, विचार र सिद्धान्तमा आधारित हुनुपर्छ । उनले भने“पार्टी खोल्दा पनि भावना होइन, वैचारिक धरातल चाहिन्छ।,”
संघीयतालाई थप सुदृढ बनाउन संविधानमै संरचनागत सुधार आवश्यक रहेको बताए। भ्रष्टाचार नियन्त्रण, सुशासन र पहिचानको सुनिश्चितता आजको मुख्य आवश्यकता भएको बताए।
धरानको भानुचोकमा सम्पन्न उक्त कोणसभामा जसपाका स्थानीय नेता, कार्यकर्ता तथा सर्वसाधारणको उल्लेख्य उपस्थिति रहेको थियो।
