धरान: धरान-१५ स्थित हिबिस्कस इङ्लिस बोर्डिङ स्कुलले फुट्सल प्रतियोगितामा विजयी अभिभावक टोलीलाई बुधबार सम्मान गरेको छ।
स्कुल परिसरमा आयोजित कार्यक्रममा प्रबन्ध निर्देशक गङ्गाराम राई तथा भाइस प्रिन्सिपल विजय सिंह थेबेले विजेता अभिभावकहरूलाई खादा, मेडल र प्रमाणपत्र प्रदान गर्दै सम्मान गरेका हुन्।
गत असार १३ गते धरान-५ देउरालीस्थित डिडी फुट्सलमा महिला शिक्षक र महिला अभिभावकबीच सम्पन्न मैत्रीपूर्ण फुट्सल प्रतियोगितामा अभिभावक टोलीले शिक्षक टोलीलाई ५–० गोल अन्तरले पराजित गर्दै उपाधि जितेको थियो।
कार्यक्रममा प्रबन्ध निर्देशक राईले शिक्षक र अभिभावकबीचको सम्बन्धलाई अझ प्रगाढ बनाउने, आपसी सहकार्य बढाउने तथा शारीरिक तन्दुरुस्तीप्रति प्रेरित गर्ने उद्देश्यले प्रतियोगिता आयोजना गरिएको जानकारी दिए।
सम्मानित अभिभावकहरूले पनि प्रतियोगितामार्फत शिक्षकहरूसँग नजिकिने, घुलमिल हुने र खुसीयालीका साथ समय बिताउने अवसर मिलेको भन्दै यस्ता कार्यक्रमले विद्यालय र अभिभावकबीचको सम्बन्ध थप सुदृढ हुने विश्वास व्यक्त गरेका थिए।
