धरानमा पदयात्राको सुरु संगै सामाजिक कार्यमा क्रियाशील सेवक अभियानले स्थापना भएको १० वर्षमा प्रवेश गरेको अवसरमा दशौँ स्थापना दिवस मनाएको छ ।
पदयात्रा, सरसफाइ एवम् अन्य सामाजिक र मानवीय कार्यमा क्रियाशील रहेको अभियानले शुक्रवार धरान-३ मा रहेको सपिङ कम्प्लेक्स औपचारिक कार्यक्रम गर्दै दशौँ स्थापना दिवस मनाएको हो ।
कार्यक्रमका प्रमुख अतिथि कोसी प्रदेश सभा सदस्य रमेश बस्नेतले संस्थाको दशौँ स्थापना दिवसको शुभकामना व्यक्त गर्दै अभियानको निरन्तरताको कामना गरेँ ।
विशिष्ट अतिथि रहेका धरानका उपमेयर अइन्द्र विक्रम बेघाले अभियानले अहिले सम्म कमाएको ख्याति जोगाउँदै आगामी दिनमा अझै क्रियाशील भएर लागी पर्न सुझाव दिएका थिए ।
धरानको वर्तमान अवस्थाका बारेमा बोल्दै उनले गलत गर्नेलाई गलत र सही गर्ने सही भन्ने परिपाटी बसाल्नु पर्नेमा जोड दिए ।
कसैलाई अनावश्यक रूपमा उचाल्ने र देवत्वकरण गर्ने प्रवृत्ति हानिकार हुने बताउँदै धरान बनाउन सबै पक्ष संयमित भएर लाग्नुपर्नेमा जोड दिए ।
अतिथि प्राडा विक्रम प्रसाद श्रेष्ठले अभियानको निरन्तरताको शुभकामना व्यक्त गरे ।
सिराहा सरसफाइ अभियानका संयोजक समेत रहेका अतिथि धिरेन्द्र साहले सेवक अभियानले चलाएको पदयात्राको प्रशंसा गरेका थिए ।
कार्यक्रममा पञ्चेबाजा महिला समूहका महिला दिदिबहिनीहरुले रोमाञ्चक नाटक समेत प्रस्तुत गरेका थिए ।
अभियानले १०औँ स्थापना दिवस सँगै छैटौँ साधारण सभा समेत सम्पन्न गरेको छ । साधारण सभाले सर्वसम्मत रूपमा नयाँ कार्य समिति समेत चयन गरेको अभियानका नवनिर्वाचित सचिव अफाक अहमदले जानकारी दिए ।
नयाँ कार्यसमितिको अध्यक्षमा राजीव हलुवाई, उपाध्यक्ष ममता शर्मा पौडेल, महासचिव खगेन्द्र कुँवर, सचिव अफाक अहमद, कोषाध्यक्ष कमल गोयल र चिफ कोर्डिनेटरमा दीप श्रेष्ठ चयन भएका छन् ।
त्यसै गरी सदस्यहरूमा अमृता राई, मात्रिका प्रसाद नेपाल, अस्मिता भुजेल, हरेन्द्र चेम्जोङ र लक्ष्मी सिजापतिलाई चयन गरिएको अध्यक्ष राजीव हलुवाईले जानकारी दिए ।
