धरान खेलकुद मञ्चको आयोजनामा ‘धरान खेलकुद महोत्सव’२०८२ आयोजना हुने भएको छ। शनिबार धरान–१६ रंगशालामा आयोजित पत्रकार सम्मेलनमा महोत्सव संयोजक कुवेरमान राईले कार्यक्रमको जानकारी दिएका हुन्।
मञ्चले आफ्नो वार्षिक कार्यक्रम अनुरुप मंसीर २५ गते देखि पौष १० गते सम्म ऐतिहासिक वृहत धरान खेलकुद महोत्सव गर्ने जानकारी दिएको छ । धरान खेलकुद मञ्चका अध्यक्ष किशोर राईले महोत्सव ८ दिनसम्म सञ्चालन हुने बताउँदै खेलकुदसँगै सङ्गीत, मनोरञ्जन, खेल–तमासा र खानेकुराका स्टल समेत रहने जानकारी दिए। उनले व्यवसायिक खेलकुद विकास, खेलाडीको सम्मान र खेलकुदमै नगरको पहिचान बनाउने उद्देश्यसहित धरानलाई ‘खेलकुदको शहर’ घोषणा गर्ने प्रस्ताव अघि बढाइएको बताए।
कार्यक्रमका क्रममा वर्ष खेलाडी, प्रशिक्षक र लिजेन्ड सम्मान समेत गरिनेछ। महोत्सव अवधिभर पूर्व–वर्तमान सर्वश्रेष्ठ खेलाडी तथा राष्ट्रिय–अन्तर्राष्ट्रिय ओलम्पियनहरूले जितेका पदक र खेल सामग्रीहरूको विशेष प्रदर्शनी राखिनेछ।
फुटबल, गल्फ, सुटिङ, बास्केटबल, हक्की, डोरी तान, आर्चरीलगायत खेलका थिम स्टल पनि रहनेछन्। आयोजकका अनुसार प्रदर्शनी र प्रतियोगिताले “धरान खेलकुदको शहर हो” भन्ने सन्देश देश–विदेशमा प्रवाह गर्ने लक्ष्य लिएको छ।
मेयर कप स्कूल ओलम्पिक २०८२ आयोजना हुने
बिगत वर्षहरूमा रोकिएको मेयर कप यस वर्ष पुनः सुरु हुँदैछ। विद्यालयस्तरका विद्यार्थीको प्रतिभा प्रस्फुटन गर्ने उद्देश्यसहित १२ खेल विधामा प्रतिस्पर्धा गराइने भएको छ।
प्रतियोगिताहरू सितोरियो कराँते, फुटबल, टेबलटेनिस, टेक्वान्दो, बास्केटबल, ब्याडमिन्टन, भलिबल, क्रिकेट, एथलेटिक्स, उसु, जुडो र सेपाक्ताक्रो समावेश हुने भएका छन ।
प्रतियोगिताको अनुमानित खर्च रु २८ लाखमध्ये धरान उपमहानगरले १३ लाख बजेट विनियोजन गरेको र बाँकी रकम महोत्सवबाट संकलन गरिने अध्यक्ष राईले बताए।
