धरान: धरान उपमहानगरपालिका वडा नम्बर १५ स्थित शिवगंगा बस्तीमा रहेको सिलाम साक्मा बाल विकास केन्द्रलाई खेलकुद तथा शैक्षिक सामग्री सहयोग प्रदान गरिएको छ ।
शुक्रबार आयोजित एक कार्यक्रमका बीच वडा अध्यक्ष नरेश इवारामले करिब १ लाख रुपैयाँ बराबरको सामग्री बाल विकास संरक्षण समितिका अध्यक्ष रत्न लिम्बूलाई हस्तान्तरण गरे ।
हस्तान्तरित शैक्षिक सामग्रीमा बालबालिकाका लागि आवश्यक खेलकुदका सामान र शैक्षिक सामग्री छन् । उक्त सामग्री र भवनको सिलिङ निर्माणका लागि रोटरी क्लब अफ घोपाले प्राविधिक तथा आर्थिक सहयोग उपलब्ध गराएको हो ।
कार्यक्रममा बोल्दै वडा अध्यक्ष इवारामले बालबालिकाको प्रारम्भिक विकासमा यस्ता सामग्रीले महत्त्वपूर्ण भूमिका खेल्ने बताए । रोटरी क्लबले सामाजिक उत्तरदायित्व अन्तर्गत विद्यालयको भौतिक सुधार (सिलिङ निर्माण) र शैक्षिक क्षेत्रमा पुर्याएको योगदानको स्थानीयले प्रशंसा गरेका छन् ।
हस्तान्तरण कार्यक्रममा संरक्षण समितिका प्रतिनिधि, टोल विकास संस्थाका पदाधिकारी र अभिभावकहरूको उपस्थिति थियो ।
