धरान: धरानमा जारी कोशी प्रदेश प्रिमियर लिग फुटबल प्रतियोगिताको समुह चरणको खेलहरु सकिए पश्चात सुपरलिगको खेल तालिका सार्वजनिक गरिएको छ ।
शनिबार धरान रंगशालामा पत्रकार सम्मेलन गर्दै लिग आयोजक कोशी प्रदेश फुटबल संघका अध्यक्ष किशोर राईले खेल तालिका सार्वजनिक गरेका हुन् ।
कोशी प्रदेशका ११ जिल्लाका जिल्ला लिग च्याम्पियनहरुको सहभागीता रहेको लिगमा ४ समुह बनाएर समुह चरणको लिग गराइएको थियो । जस अनुसार समुह ए बाट पाँचथरको पाँचथर युनाइटेड, बी बाट उदयपुरको गाईघाट फुटबल क्लब, सि बाट धनकुटाको देउराली युथ क्लब र डि बाट खोटाङको बुइपा–११ सुपरलिगमा प्रवेश गरेका हुन् ।
शनिबार सार्वजनिक तालिका अनुसार लिगको पहिलो खेलमा फागुन ४ गते बुइपा–११ र पाँचथर युनाइटेड खेल्नेछन् । दोस्रो खेल ४ गते नै गाईघाट र देउरालीबीच हुनेछ । त्यस्तै ६ गते बुइपा र गाईघाट विहान खेल्नेछन् भने दिउसो पाँचथर र देउरालीले खेल्नेछन् । त्यस्तै ८ गते विहान पाँचथर र गाईघाट खेल्नेछन् भने दिउसो बुइपा र देउरालीले खेल्नेछन् । लिगका आधारमा हुने खेलमा लिग विजेताले २ लाख, , उपविजेताले १ लाख ५० हजार, तेस्रो हुने टिमले १ लाख २५ हजार र चौथो हुने टिमले १ लाख नगद पुरस्कार प्राप्त गर्नेछन् । लिगको विजेता र उपविजेता टिम राष्ट्रिय लिगको छनौटका लागि हुने अन्तरप्रादेशिक लिग खेल्न छनौट हुनेछन् ।
कोशी प्रदेश फुटबल संघको आयोजनामा फागुन ८ गतेसम्म सञ्चालन हुने प्रतियोगितामा ११ जिल्लाका जिल्ला लिग च्याम्पियन क्लबहरुको सहभागीता थियो ।
