धरान: धरान उपमहानगरपालिकाले भानुचोकस्थित पुरानो बसपार्कलाई धरान–८ मा निर्माण गरिएको स्मार्ट बसपार्कमा स्थानान्तरण गर्ने तयारीसँगै नयाँ यातायात व्यवस्थापन प्रणाली लागू गर्ने भएको छ।
कार्यपालिकाको जेठ २२ गतेको निर्णयअनुसार असार १ गतेदेखि भानुचोक आसपासको क्षेत्रमा वान–वे प्रणाली लागू गरिनेछ। सो निर्णयसँगै बसपार्क स्थानान्तरण प्रक्रिया पनि औपचारिक रूपमा अघि बढाइने भएको हो।
नयाँ व्यवस्था अनुसार माछाभौडीबाट सदन स्कुल,पिण्डेश्वरी चोक हुँदै बरगाछी–अरुण पेट्रोल पम्पसम्मको सडक खण्डमा वान–वे लागू हुने बजार अनुगमन अधिकृत बेद प्रसाद सापकोटाले जानकारी दिए।
सापकोटाका अनुसार रुट व्यवस्थापनलाई सहज र प्रभावकारी बनाउन मंगलबार स्थलगत अनुगमन गरिएको हो। अनुगमनका क्रममा सडक प्रयोगको अवस्था, ट्राफिक चाप तथा सम्भावित जाम हुने क्षेत्रहरूको अध्ययन गरिएको उनले बताए।
उनले रुट व्यवस्थापनलाई व्यवस्थित बनाउन आवश्यक सुधारका पक्ष पहिचान गर्दै आगामी दिनमा थप समन्वयात्मक कदम चालिने जानकारी दिए।
भानुचोक क्षेत्रमा लामो समयदेखि देखिँदै आएको ट्राफिक चाप घटाउने उद्देश्यले बसपार्कलाई स्मार्ट बसपार्कमा सार्ने निर्णय गरिएको उपमहानगरपालिकाले जनाएको छ। धरान–८ मा निर्माण सम्पन्न भएको स्मार्ट बसपार्क सञ्चालनका लागि आवश्यक पूर्वाधार तयारी पूरा भएको पनि जनाइएको छ।
नयाँ प्रणाली लागू भएपछि ट्राफिक व्यवस्थापन थप सहज हुने अपेक्षा उपमहानगरपालिकाले गरेको छ।
