धरानः बस्ती रक्षा आन्दोलन परिचालन समितिको आयोजनामा बुधबार साँझ धरानमा राँके जुलुस प्रदर्शन गरिएको छ ।
पुरानो अस्पताल छाताचोकबाट सुरु भएको राँके जुलुस नगरका विभिन्न भाग परिक्रमा गर्दै भानुचोक पुगेको थियो । सुरुवाती चरणदेखि नै प्रहरीले जुलुसलाई रोक्ने प्रयास गरेको थियो ।
चारैतर्फबाट भानुचोक केन्द्रित भएको जुलुसलाई देशीलाइन क्षेत्रमा प्रहरीले अवरोध गरेपछि केहीबेर तनावको अवस्था सिर्जना भएको थियो । प्रदर्शनकारी र प्रहरीबीच धकेलाधकेल तथा सामान्य हातहालाहाल समेत भएको थियो ।
केही समयपछि अवस्था सामान्य बनेपछि प्रदर्शनकारीहरूले मानव साङ्लो बनाएर कोणसभाको आयोजना गरेका थिए ।
प्रदर्शनमा सहभागीहरूले सुकुम्बासी बस्तीमाथि दमन नगर्न, वैकल्पिक व्यवस्थाविना हटाउन नखोज्न तथा नागरिकको आवास अधिकार सुनिश्चित गर्न माग गरेका थिए ।
