धरान: धरान ८ तीनकुनेमा रहेको शनि मन्दिरमा भक्तजनहरुको विहानैदेखि घुइँचो लागेको छ । चैत्र महिनामा पर्ने शनिवार शनि मन्दिरमा गएर दर्शन र पूजाआजा गर्दा दशाग्रह हँटेर सुख प्राप्ति हुने जनविश्वास भएका कारण यस मन्दिरमा धरानबाट मात्र हैन कोशी प्रदेशका विभिन्न स्थानबाट यस मन्दिरमा दर्शन गर्न आउनेको भीड बढ्ने गरेको हो ।
पछिल्लो समय शनिग्रह प्रति सर्वसाधारणको विश्वास बढ्दै गएको छ । सनातान हिन्दु धर्ममा शनि भवगानलाई सूर्यपुत्रको रुपमा लिने गरिन्छ । अन्य समयमा भन्दा चैत्र महिनाको शनिवार शनि भगवानको दर्शन तथा पूजा गरेको खण्डमा परिवारमा सुख शान्ति हुने जनविश्वास रहेका कारण चैत्र महिनाको प्रत्येक शनिवार यो मन्दिरमा अत्याधिक भीड हुने गरेको छ ।
अझ यस क्षेत्रमा शनि मन्दिरसँगै संकटा भगवती र नवग्रहको मूर्ति स्थापना भएपछि यो मन्दिरमा चहलपहल अझ बढ्दै गएको हो । धरानका विमल शाक्य शनिवार विहीबा धरान ८ तीनकुनेमा रहेको सनी मन्दिमा शनि दशा हटाउन पुग्नु भयो । उहाँले चैत्र महिनाको शनिवार यहाँ आएर दर्शन गरे जीवनमा कहिल्यै दशा नलाग्ने र परिवारमा सुख शान्ति हुने बताउनुभयो ।
उहाँले मात्र हैन चैत्र महिनामा शनिवारकै दिन पारेर शनि मन्दिरमा आएर पूजाआजासँगै दशग्रह हटाउँदा आफु र आफ्नो परिवारलाई सधै शान्ति मिल्ने विश्वास त्यहाँ आउने भक्तजनहरु बताउँछन् ।
शनि मन्दिर विस्तारै आस्थाको केन्द्र बन्दै गएका कारण भक्तजनहरुको भीड बढ्दै गएको मन्दिरमा दर्शन गर्न आउनेको भीड बढ्दै गएको मन्दिर व्यवस्थपन समितिका पदाधिकारीहरु बताउँछन् । यो शनिवार चैत्र दशै परेका कारण भक्तजनहरुको भीड अत्याधिक रहेको मन्दिर व्यवस्थापन समितिका अध्यक्ष राजकुमार निरौलाले बताउनुभयो । यहाँ आउने भक्तजहरुको सुविधाका लागि खानेपानी तथा शौचालयको व्यवस्थापन गरिएको उहाँले बताउनुभयो ।
आजको शनिवार १० देखि १५ हजारसम्म भेटी उठेको व्यवस्थापन समितिले जनाएको छ । यहाँ दैनिक १ सय देखि २ सय जना सर्वसाधारण आउने गरे पनि शनिवार भने ५ हजारसम्म भक्तजनहरु दर्शन गर्न आउने गरेका छन् । अझ चैत्रको शनिवार यो संख्या बढ्ने गरेको व्यवस्थापन समितिका अध्यक्ष निरौलाले बताउनुभयो ।
विहानैदेखि शनिवारमा अत्याधिक भीड बढेका कारण व्यवस्थापन समितिलाई भीड व्यवस्थापन गर्न नै समस्या भएको थियो । आस्थाकै कारण बर्षेनी भक्तजनहरुको संख्या बढ्दै गएको मन्दिर व्यवस्थापन समितिले जनाएको छ ।
