धरानः चैत ९ गते देखि सुरु भएको ९ औं हराईजन बास्केटवल कपको मंगलबार भएको फाईनल खेलमा त्रिभूवन आर्मी क्लब तेस्रो पटक च्याम्पियन भएको छ ।
फाईनल खेलमा आर्मीले ११३–७० को फराकिलो स्कोरमा धरान टिम कालोलाई हराउँदै तेस्रो पटक च्याम्पियन भएको हो । सो प्रतियोगिता धरान १७ श्री माबिको बास्केटबल कोटमा सम्पन्न भएको थियो।
पहिलो क्वार्टरमा आर्मीले ३८–१३ को फराकिलो अन्तरमा स्कोर गरेपनि दोस्रो क्वार्टरमा धरानले २२–२१ को स्कोर गरेको थियो । तर, तेस्रो र चौथो क्वार्टरमा भने आर्मीले २७–१४ र २७–२१ स्कोरले धरानलाई रोक्दै उपाधिमाथि कब्जा जमायो ।
च्याम्पियन आर्मीले उपाधी ट्रफीसँगै नगद १ लाख ५१ हजार १११ रुपैयाँ हात पारेको छ भने उपविजेता धरान टिम कालोले नगद पुरस्कार ७५ हजार पाएको छ । प्रतियोगिताको सर्वोत्कृष्ट खेलाडी निश्चल महर्जन घोषित हुदै नगद २५ हजार हात पारे भने उदयीमान खेलाडी घोषित भएका धरान कालोका साहिल तामाङले नगद १० हजार पाए । फाइनल खेलको म्यान अफ दि म्याच धरान कालोका सर्बो राई भए ।
उक्त प्रतियोगिताको समापन समारोहमा राष्ट्रिय समाचार समिति (रासस) धरानकी समाचारदाता संगीता राई (स्वर्णिम)लाई हराइजन क्लब धरानले सम्मान गरेको छ ।
बास्केटवल खेल र हराइजन क्लबको गतिविधिहरुलाई समाचार सम्प्रेषणमा योगदान दिएको भन्दैं रु. १० हजार नगद र सम्मानपत्रले क्लबका अध्यक्ष श्रीभक्त राईले सम्मान गर्नु भएको थियो।
वडा नं १७ का वडाअध्यक्ष सुर्यबहादुर भट्टराई (मनोज) प्रमुख अतिथि रहेको समापन समारोहमा विजेता र उपविजेता खेलाडीहरुलाई आयोजक हराईजन क्लबका अध्यक्ष श्रीभक्त राई, पुर्वराष्ट्रिय खेलाडी इन्दु रसाइली, वडा नं १६ का अध्यक्ष मुरारी भट्टराई, अग्रज पत्रकार हर्ष सुब्बालगायतले पुरस्कार विरतण गरेका थिए ।
