धरान: कथाकार शुभचन्द्र राईको कथा सङ्ग्रह ‘समयले जन्माएका कथाहरू’ बुधबार धरानमा लोकार्पण गरिएको छ ।
किरात राई यायोक्खा सुनसरीको भवनमा एक कार्यक्रम गरि किरात राई यायोक्खा पुर्ब अध्यक्ष, धरान उपमहानगरपालिकाका निवर्तमान मेयर तिलक राई भाषाविद् प्रा.डा. टङ्कप्रसाद न्यौपाने, नाट्यकर्मी गोपाल देवान, कथाकार शुभचन्द्र राईले विमोचन गर्नु भएको थियो ।
कथाको समीक्षा गर्दै प्रा.डा न्यौपानेले समय अभावले पुरै अध्यान गर्न नसकेपनि कथा लेख्नमा केही कमजोरी भए पनि शुभचन्द्रका ७ वटा कथा पढ्दा भाषामा जनबोली रहेको छ । गाउँघरमा हामी जे बोल्छौँ, त्यो यहाँ आएको छ, कथामा ग्रामीण परिवेश अधिक रूपमा आएको उहाँले बताउनुभयो ।
अर्का समीक्षक गोपाल देवानले नेपाली साहित्यको क्षेत्रमा एउटा इँटा थप्न सफल भएको बताउनुभयो । उहाँले शिल्पगत हिसाबमा निकै सशक्त रहेको बताउनुभयो ।
उहाँले भन्नुभयो, विचारगत रूपमा पनि सशक्त छ, यो एउटा समय र कालखण्डको कथा मात्रै होइन, सबै समय र कालखण्डको कथा हो ।
सीमान्तकृत, किनारीकृतहरूका बिम्ब, मिथक र प्रतीकहरू आएका छन् उहाँले भन्नुभयो, परिवेश प्रस्तुत गर्ने शैली पनि एकदमै राम्रो रहेको छ । चरित्रचित्रण, परिवेश चित्रण अन्त्यन्तै राम्रो रहेको छ उहाँले यो सामाजिक यथार्थवादी कथाकै रूपमा रहेको औँल्याउनुभयो ।
कथा प्रकाशनमा सम्पादन पत्रकार गणेश राईले गर्नुभएको थियो, कथाकार राईको यसअघि पनि केही कविता सङ्ग्रहहरू प्रकाशन भइसकेको उहाँले बताउनुभयो ।
कथाकार शुभचन्द्र राईले आफूले सत्य घटनालाई नै कथाको रूपमा उतारेको बताउनुभयो । मैले सत्य घटनालाई कथाको स्वरूपमा ढालेको हुँ उहाँले भन्नुभयो, ।
ओखलढुंगाको वामधालमा २०२४ सालमा जन्मिनुभएको राई वाम्बुले राई भाषाका लेखक समेत हुनुहुन्छ । उहाँको पहिलो कृति “ल्आकाचिम सारिङ्मो” (रातो भाले) २०६८ सालमा प्रकाशित भएको थियो । धरानमा हुर्केर शिक्षा हासिल गर्नुभएको राई २०४० सालदेखि शिक्षण, सामाजिक सेवा र साहित्य सिर्जनामा सक्रिय हुनुहुन्छ । हाल उहाँ बेलायतमा बसोबास गर्दै आउनुभएको छ ।
उक्त पुस्तक लोकापर्ण कार्यक्रम किरात राई यायोक्खा सुनसरीको आयोजनामा भएको थियो। विभिन्न संघ संस्था र लेखकहरुको उपस्थीती रहेको थियो।
