धरान: इन्द्रावती, सेती नदीलगायत सप्तकोशी नदीका सातै अङ्ग र जल महादेव, जल सिकारीको पूजा अर्चना गरी सुब्भेफाप्बेको मङ्गल कामना गर्दै आज माझी समुदायले कोशी (लदी) पूजा पर्व धुमधामका साथ मनाइरहेका छन् ।
जीवनदायिनी कोशी नदी र डुङ्गाको पूजा गर्दै समुदायले हर्षोल्लासका साथ कोशी नदी किनारमा जात्रा र पर्व आयोजना गरी पुख्र्यौली चाड मनाएका छन् । प्रथाअनुसार धूपधुवाँर, फलफूल र पञ्चवली दिई कोशी पूजा गरिंदैछ ।
कोशी किनारमा सुनसरी मोरङ, झापा, उदयपुर लगायतका जिल्लाबाट भेला भएका माझी समुदायले लदी पूजा धूमधाम मनाउने गरेका छन् । शक्ति स्वरुपेणी जलदेवी, सेतीदेवीको आराधना गरी कोशी नदीमा राँगा, सुँगुर, पाठी, कुखुरा, परेवाको पन्चवली दिने परम्परा रहेको छ ।
नेपालमा रहेका विभिन्न जातजातिहरू मध्ये छुट्टै पहिचान र विषेशता बोकेको माझी जातिको प्रमुख चाड लदी (कोशी) पूजाका अवसरमा सार्वजनिक बिदा दिने निर्णय गर्न समुदायले माग गर्दै आएका छन् ।
माझी समुदायको नेपालको मध्य पहाडी, भित्री मधेश र तराईका जिल्लाहरूमा प्रमुख बसोबास रहेको छ । परम्परादेखि नदी, खोलामा निर्भर माझी समुदायको पुख्र्यौली पेसा माछा मार्ने र डुङ्गा चलाउने भएता पनि हाल कृषि पेसालाई मुख्य पेसाको रूपमा लिँदै आएका छन् । छुट्टै इतिहास, भाषा, संस्कार, संस्कृति, पहिचान र विशेषता भएको यो जातिहरूको बसोबास प्रायःजसो नदी किनारमा रहेको छ । आज स्थानीय सरकार बराहक्षेत्र नगरपालिकाले कोशी पूजाको अवसरमा स्थानीय बिदा दिएको छ।
