धरान: आज महाशिवरात्री, विहानैदेखि शिवालयहरुमा भक्तजनहरुको भीड लागेको छ । कोशी प्रदेशका विभिन्न शिवालयझै धरान -१४ विजयपुरमा रहेको पिण्डेश्वर मन्दिरमा विहानैदेखि भक्तजनहरुको भीड लागेको छ । भगवान शिवको प्यारो दिनमा रुपमा लिने गरिएको शिवरात्रीमा शुद्ध भई भगावन शिवको पूजाअर्चना गरेमा मनोकांक्षा पूरा हुने जनविश्वासका साथ पिण्डेश्वर मन्दिरमा भक्तजनहरुको भीड बढेको हो ।
महाशिवरात्री अथवा शिवरात्री हिन्दु धर्मावलम्बीहरूको महान चाड हो । भगवान शिवको उत्पत्ति भएको रातका नामबाट नामकरण भएको यो पर्व कालरात्री, मोहरात्री, सुखरात्री र शिवरात्री नामक चार प्रमुख रात्री मध्ये एक पवित्र पर्वका रूपमा विभिन्न पुराणहरूमा वर्णन छ । फागुन कृष्ण चतुर्दशीका दिन मनाइने यस पर्वलाई सम्पूर्ण दिन दुःखी र कष्टपूर्ण अवस्थामा रहेका प्राणीहरूको हृदयमा धर्मको उदय गराउने आशुतोष भगवान् शिवको अति प्यारो दिनका रूपमा पनि लिइने गरिन्छ । व्रत उत्सव मध्ये सर्वोत्तम कहलिएको महाशिवरात्रीका दिन भक्तजनहरूले शुद्ध भई शिव मन्दिरमा पूजा–अर्चना गरी व्रत बस्ने र भगवान् शिवको प्रिय वस्तु दूध, धतुरो र बेलपत्र भगवानलाई चढाउने गर्दछन ।
पिण्डेश्वर मन्दिरमा प्रत्येक बर्षको साउन महिनाको सोमबारझै शिवरात्रीका दिन भक्तहरुको भीड लाग्ने गरेको छ । पौराणिक कथामा समेत पिण्डेश्वर मन्दिरको महिमाको वर्णन गरेका कारण यस मन्दिरमा विशरात्रीका दिन धरानका मात्र हैन धरान बाहिरदेखि भक्तजनहरु आउने गरेका छन् ।
कोशी प्रदेशम रहेका मठमन्दिरमा पछिल्लो समय धार्मिक पर्यटक बढ्दै गएकोले कोशी प्रदेशले आयोजना गरेको पर्यटन बर्ष २०८२ ले धरानलाई धार्मिक पर्यटकीय क्षेत्रको रुपमा विकास गर्न सकिने कोशी प्रदेशकी सांसद यसोदा कायस्थले बताउनुभयो । उहाँले पर्यटन बर्षलाई लक्षित गरी धरान लगायत आसपासका मठमन्दिरको प्रचारप्रसारलाई तिब्रता दिएको बताउनुभयो ।
पिण्डेश्वर मन्दिरमा भक्तजनहरुको भीडलाई मध्यनजर गरेर लाइनको व्यवस्था, पानीको व्यवस्था लगायतका सबै सेवा प्रदान गरिएको छ । लाइनका लगि नेपाल प्रहरी, स्वयमसेवक साथै पानीलगायतका अत्याश्यक कुराका लागि मारबाडी सेवा समिति, खस क्षेत्री एकता समाज लगायतको सक्रियता बढेको छ ।
भक्तजनहरुलाई दर्शन गर्न सहज होस् भन्ने उद्देश्यले लाइनलाई व्यवस्थित गरिएको पिण्डेश्वर बाबाधाम समितिका अध्यक्ष विकास वनेपालीले जानकारी दिनुभयो ।
धर्मप्रति सर्वसाधारणको आस्था बढेकै कारण चाडपर्वमा उल्लेख्य भीड बढ्ने गरेको छ भने पिण्डेश्वर मन्दिरमा अन्य दिनसमेत नेपाल लगायत भारतका दर्शानार्थीहरु समेत आउने गरेका छन् ।
फागुन कृष्ण चतुर्दशीमा मनाइने यस पर्वमा पनि भक्तजनहरुको भीड प्रत्येक बर्ष बढ्दै गएको पिण्डेश्वर बाबाधाम समितिले जनाएको छ । सृष्टिको प्रारम्भमा यसै दिन मध्यरात्रि कालमा भगवान् शंकर ब्रह्माबाट रुद्रका रूपमा अवतरण भएका थिए भन्ने धार्मिक विश्वास रहेको छ । प्रलयकालमा यसै दिन प्रदोषको समयमा भगवान शिव ताण्डव गर्दै ब्रह्माण्डलाई तेस्रो नेत्रको ज्वालाबाट समाप्त गर्नेछन् भन्ने मान्यता पनि पुुराणमा उल्लेख भएको पाइन्छ ।
