धरान: जगत गुरु बालसन्त श्री मोहनशरण देवाचार्यको अगुवाईमा विगत तीन वर्षदेखि निरन्तर सञ्चालन हुँदै आएको वृहत्तर बराहक्षेत्र पैदलयात्रा यस वर्ष पनि भव्य रूपमा सम्पन्न हुँदैछ । नेपालका विभिन्न धार्मिक अनुयायीहरूको सहभागितामा कार्तिक १ गतेदेखि सुरु भएको यो यात्राले आइतबार धरान–१४ विजयपुरस्थित पवित्र पिण्डेश्वर मन्दिरमा आएर विश्राम लिएको छ ।
जगत गुरु बालसन्त देवाचार्यका अनुसार पौराणिक ग्रन्थहरू महाभारत, बाल्मीकि रामायण, बराह महापुराण र स्कन्द पुराणको हिमवत खण्डमा उल्लेखित वृहत्तर बराहक्षेत्रलाई जीवन्तता दिनका लागि यो यात्रा सुरु गरिएको हो । तीन वर्षअघि प्रारम्भ गरिएको धार्मिक यात्राले यस वर्ष पनि निरन्तरता पाएको उहाँले बताउनुभयो ।
भारतका वृन्दावन, चित्रकूट, नर्मदा, अयोध्या र काशीविश्वनाथ परिक्रमा जस्तै नेपालका धार्मिक आस्थाका केन्द्रहरूमा पनि श्रद्धालुहरूलाई जोड्ने उद्देश्यले यो यात्रा सुरु गरिएको उहाँको भनाई छ ।
यस यात्रामा देशका विभिन्न स्थानका धर्मानुयायीहरूको उपस्थितिलगायत उत्साहपूर्ण सहभागिता देखिएको थियो । वृहत्तर बराहक्षेत्र अन्तर्गतका प्रमुख तीर्थस्थलहरूमा सुनसरीको चतरास्थित बराहक्षेत्र, उदयपुरको मैनामैनी, धनकुटाको त्रिवेणी र मुलघाट, सुनसरीको धरान–४ स्थित शिवजट्टा, धरान–१४ पिण्डेश्वर मन्दिर, दन्तकाली, धरान–२० विष्णुपादुका, इटहरीको बृद्धगंगा, रामधुनी, चकरघट्टी, कौशिकी नदी र देवघाट रहेका छन् ।
बालसन्त देवाचार्यले दस दिन लामो यो पैदलयात्रा निकै कष्टकर भए पनि आत्मसन्तुष्टिदायक रहेको उल्लेख भएको बताउनुभयो । उहाँका अनुसार बराहक्षेत्रबाट सुरु भएको यात्रा मैनामैनी, त्रिवेणीधाम, धनकुटाको सफाइटार, मुलघाट, कार्कीछाप, शिवजट्टा हुँदै पिण्डेश्वर मन्दिरसम्म आइपुग्दा अद्भुत आध्यात्मिक अनुभूति भएको बताउनु भएको हो । उहाँका अनुसार यात्रा सोमबारदेखि पुनः तराहरा, इटहरी, झुक्का, रामधुनी, चकरघट्टी हुँदै चतरामा पुगेर टुंगिनेछ ।
देवाचार्यले यस धार्मिक अभियानलाई आगामी वर्षहरूमा पनि निरन्तरता दिने प्रतिबद्धता जनाउँदै यात्राको सफलताका लागि सहयोग गर्ने सबैप्रति आभार व्यक्त गर्नुभयो ।
