धरानः नेपालको शारिरीक सुगठनको क्षेत्रमा अन्तर्राष्ट्रिय ख्याती कमाएका राष्ट्रीय सम्मान प्राप्त स्वर्गिय राजभगत प्रधानाङ्गको स्मृतिमा धरानमा प्रथम प्रदेश ‘मिस्टर राजभगत क्लासिक बडिबिल्डिङ च्याम्पियनसिप प्रतियोगिता हुने भएको छ ।
धरान फिटनेस क्लबद्वारा बिहिबार पत्रकार सम्मेलनको आयोजना गरी उक्त जानकारी दिएको हो । क्लब प्रमुख प्रधानाङ्गका छोरा कुबेर भगत प्रधानाङ्ग प्रतियोगिता असोज १० र ११ गते हुने जानकारी दिए । शारीरिक सुगठन प्रतियोगिता धरान १८ स्थित विपी प्रतिष्ठानको साहारा हलमा हुनेछ ।
प्रतियोगितामा कोशी प्रदेशका ६० देखि ७० जना बडीविल्डर प्रतिस्पर्धामा सहभागी हुनेछन् । प्रतियोगिता ५५ केजि, ६५ केजि, ७० केजि, ७५ केजि र ८० प्लस गरि ५ तौल समुहमा हुनेछ ।
प्रथम शारिरिक सुगठकले नगद ३ लाख, दोस्रो २ लाख, तेस्रो १ लाख, चौथो ७५ हजार र पाँचौं स्थानमा रहनेले नगद ५० हजार पाउनेछन । प्रत्येक तौल समुहमा दोस्रो र तेस्रो हुने खेलाडीले जनही १५ र १० हजार नगद पुरस्कार पाउने छ । मोष्ट मस्क्युलर र बेष्ट पोजरले पनि जनही १५/१५ हजार नगद पुरस्कार पाउने छ ।
प्रतियोगीताको पहिलो दिन प्रिजजिङ राउण्ड हुनेछ । उक्त राउण्डबाट प्रत्येक तौल समुहमा ५ वा ६ जना खेलाडी छनौट हुनेछ । दोस्रो दिन हुने स्पर्धाबाट प्रत्येक तौल समुहमा पहिलो हुने खेलाडीले उपाधिको लागि हुने मुख्य प्रतिस्पर्धामा ओभरअल राउण्डमा भिड्ने अवसर पाउने छ ।
नेपालमा पहिलो पटक वडिविल्डीङ प्रतियोगिता स्वर्गिय राजभगत प्रधानाङ्गले धरानमा सुरु गरेका थिए । उनले २०२७ सालमा धरानमा बडिबिल्डिङ गर्ने व्यक्ति थिए । २०३२ सालमा पहिलो जिम खाना खोलेका थिए । प्रधानाङ्ग नेपालमा शारीरक सुगठन प्रतियोगिता बिकास र व्यवसायिकरण गर्ने पहिलो व्यक्तिको रुपमा चिनिन्छ ।
स्वर्गिय प्रधानाङ्गको पेशालाई छोरा कुबेर भगत प्रधानाङ्गले निरन्तर दिदै आएका हुन । पिताले शुरु गरेको बडिविल्डिङलाई व्यवसायीक रुपमा विस्तार गर्दै आएका एक मात्र छोरा कुवेरले बुवाको स्मृतिमा प्रदेश शारीरक सुगठन प्रतियोगितालाई संस्थागत रुपमा २/२ वर्षमा निरन्तरता दिने बताएका छन् ।
