धरान: कोशी प्रदेश फुटबल संघले गत माघ २८ देखी फागुन ८ गते सम्म आयोजित प्रिमियर लिग प्रतियोगिताको आयव्यय सार्वजनिक गरेको छ ।
धरान रङ्गशालामा सञ्चालित कोशी प्रदेशका ११ लिल्लाका क्लवहरुले भाग लिएको सो प्रतियोगिताको बुधबार पत्रकार सम्मेलनको आयोजना गरी आयव्यय एन्फा टेक्निकल सेन्टर धरानमा सार्वजनिक गरिएको हो ।
सो अवसरमा प्रदेश फुटबल संघको कोषाध्यक्ष आनन्द चौधरीले ३६ लाख ६७ हजार आय र २९ लाख ८ हजार व्यय भएको सार्वजनिक गर्नुभएको थियो । सर्वाजनिक आयव्ययमा ६ लाख ९० हजार बचत भएको र यसमध्ये एन्फाबाट २ लाख आउन बाँकी रहेको जानकारी गराइएको थियो ।
कोषाध्यक्ष चौधरीका अनुसार आयतर्फ कोशी प्रदेश सरकारबाट २० लाख, अखिल नेपाल फुटबल संघ (एन्फा)बाट प्राप्त हुने १५ लाख, गोर्खा ब्रुअरीबाट ५० हजार, रेडबुलबाट ५० हजार, धरानका पूर्व खेलाडीहरूबाट ३७ हजार र अन्य दाताहरू बाट ३० हजार रहेको छ भने व्ययतर्फ नगद पुरस्कार ७ लाख ६५ हजार, पहाडी जिल्लाका क्लबहरूलाई तयारी खर्चमा थप सेवा रकम ४ लाख २० हजार, तराईका जिल्लाहरूलाई विशेष तयारी खर्च २ लाख, रेफ्रि म्याच कमिस्नर ३ लाख ५० हजार, आयोजक समिति उपसमितिहरूलाई खान, बस्न २ लाख खर्च भएको जनाएको छ । यसैगरी प्रत्यक्ष प्रसारण, विज्ञापन मिडिया खर्च १ लाख ५० हजार, फ्लाक्स बोर्ड १ लाख ५० हजार, कप, मेडल, प्रमाणपत्र १ लाख ५० हजार, उद्घाटन समापन समारोह २ लाख ५० हजार, मेडिकल ५० हजार, आवतजावत खाजा खर्च ६० हजार, आयोजक टिमलाई ट्याक सुट ७५ हजार र प्रमुख अतिथिलाई मायाको चिनो अतिथि सत्कार खर्च ६० हजार रहेको उल्लेख गरेको छ ।
आयव्यय सार्वजनिक कार्यक्रममा कोशी प्रदेश फुटबल संघका अध्यक्ष किशोर राईले ग्रासरुटबाट खेलकुदको विकास गर्न विभिन्न प्रतियोगिताहरु आयोजना गरिने बताउदै फुटबल खेलको विकासका लागि प्रदेश फुटबल संघले आगामी दिनमा यस्ता धेरै प्रतियोगिताको आयोजना गर्दै राष्ट्रिय खेलाडी उत्पादन गर्ने र खेलाडीलाई स्वरोजगार बनाउने अभियानललाई अगाडि बढाइएको बताउनुभयो ।
