धरान: २५ औं संस्करणको गोधुली रनिङ कप फुटबल प्रतियोगितामा १४ नं. वडा र ४ नं. वडा विजयी भएको छ ।
धरानमा भइरहेको रात्रिकालिन प्रतियोगितामा आइतबार भएको पहिलो खेलमा धरानको ९ नं. वडालाई २–१ गोल अन्तरले पराजित गर्दै १४ नं. वडा क्वाटर फाइनलमा प्रवेश गरेको छ । १४ नं. वडाकालागी निमेष तामाङले खेलको १६ औं मिनेटमा गोल गरेका थिए । दोस्रो हाफको १० औं मिनेटमा गोल गर्दै १४ नं. वडाको लागी अग्रता दोब्बर बनाएका थिए । अघिल्लो संस्करणको तुलनामा उत्कृष्ट खेलेको ९ नं. वडाका लागी खेलको अन्तिम मिनेटमा लेशन राईले गोल फर्काएका थिए । खेलको म्यान अफ द म्याच १४ नं. वडाका गोलकर्ता निमेष तामाङ घोषित भए ।त्यस्तै आइतबार नै भएको दोस्रो खेलमा १ नं. वडालाई ४–१ को फराकिलो अन्तरमा पराजित गर्दै ४ नं. वडा प्रिक्वाटर फाइनलमा प्रवेश गरेको छ । ४ नं. वडाले प्रि क्वाटर फाइनलमा साविक विजेता १३ नं. वडाको सामना गर्नेछ ।
४ नं.कालागी सन्तोष लिम्बूले २ गोल गरे भने आमोस राई र आनन्द राईले एक एक गोल गरेका थिए । सुरुवातदेखि नै १ नं. वडालाई दबाबमा राखेको ४ नं. वडाले खेलको सुरुवातमा नै गोल गरेको थियो । आमोस राईले खेलको ५ मिनेटमा नै गोल गरे भने आनन्द राईले खेलको १५ औं मिनेटमा गोल गरेका थिए । पहिलो हाफमा २–० ले अघि रहेको ४ नं. वडाले दोस्रो हाफको ११ औं मिनेटमा सन्तोष लिम्बूको गोल मार्फत् अग्रतालाई तेब्बर बनायो । म्यान अफ द म्याच घोषित भएका सन्तोष लिम्बूले खेल सकिन अघि इन्जुरी समयमा गोल गर्दै टोलीलाई ४–१ को अन्तरमा विजयी गराए । १ नं. वडको तर्फबाट सुलभ लिम्बूले दोस्रो हाफको १२ औं मिनेटमा सान्त्वना गोल फर्काएका थिए ।
आज सोमबार पहिलो खेलमा साझ ५ः३० बजे १८ नं. वडाले १९ नं. वडाको सामना गर्नेछ भने दोस्रो खेलमा साझ ७ः३० बजे ३ नं. वडा र ११ नं. वडा बीच खेल हुने आयोजकले जनाएको छ ।चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन् । २ नं. वडा र ७ नं.वडाले प्रतियोगितामा सहभागीता जनाउन सकेनन् । प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए ।
