धरान: बर्षौदेखि बसोबास गरेको स्थानबाट धरान उपमहानगरपालिकाले बहुसाँस्कृतिक पार्क निर्माणको नाममा उठाउने चलखेल गरेको धरान ५ सुन्दरबस्तीका सुकुम्बासी भूमिहीनहरुले बताएका छन् ।
उनीहरुले शुक्रबार नेपाल पत्रकार महासंघ सुनसरीको हलमा आयोजित पत्रकार सम्मेलनमा उपमहानगरपालिकाको वहुसाँस्कृतिक पार्क निर्माणको योजनाले १०५ परिवार विस्थापित हुने अवस्थामा पुगेको बताएका हुन् ।
२०६४ सालदेखि बसोबास गर्दै आएका यस बस्तीका सर्वसाधारणले धरान उपमहानगरपालिकाले वैकल्पिक व्यवस्था नगरी ल्याएको योजनाले घरबास विहीन भएको नेपाल बसोबास बस्ती संरक्षण समाजका सुनसरी अध्यक्ष थामसेर लिम्बुले जानकारी दिनुभयो ।
उहाँले यस विषयमा अदालतमा समेत मुद्धा दायर भइसकेको अवस्थामा अदालतबाट पनि फैसला नआइसकेको अवस्थामा उपमहानगरपालिकाले बस्न पाउने अधिकारलाई बञ्चित गरेर पार्क निर्माणको अवधारणा ल्याउनु ठीक नभएको बताउनुभयो ।
पत्रकार सम्मेलनमा सुन्दरबस्तीमा बासोबास गर्ने दिलकुमारी लिम्बु, जितबहादुर लिम्बु, रमेश राई, भिममाया देवान, महज्योति लिम्बु लगायतले न्यायको लागि माग गरेका थिए ।
धरान उपमहानगरपालिकाको २५ लाख बजेटमा पार्क निर्माणका लागि यस स्थानमा घेराबारा गरेपछि उनीहरुले आफूहरुलाई विकल्प नदिई बस्ती उठाउन खोजेको आरोप पत्रकारसम्मेलनमा लगाएका थिए । यो वस्तीमा धरान उपमहानगरपालिकाले २०६४ सालमै बस्नका लागि अनुमति दिएको थियो । त्यसबेला उपमहानगरपालिकाले घर निर्माणसँगै पानी र बत्ती जडानका लागि समेत सिफारिस दिएको थियो । ४५ घर परिवार बसोबास भएको सो स्थानमा १२० फुट जग्ग भएपनि ६२ फुट जग्गा दिने स्थानीयसँग सहमति भएको थियो । तर बस्ती नै उठाउने नियत उपमहानगरपालिकाको भएपछि उनीहरुले आपत्ति जनाएका हुन् । उनीहरुले यो ठाउँ कुनै पनि हालतमा नछोड्ने चेतावनी समेत दिएका छन् ।
र">
